පාප වර්ගය

කුසල් දහම් කිරීමෙහි ඉක්මන් විය යුතුය. පවින් සිත වළක්වා ගත යුතුය. කුසල් කිරීමෙහි ප්‍රමාද වන්නාගේ සිත පවෙහි ඇලී සතුටු වෙයි.

මිනිසෙකු අතින් පවක් සිදුවුවහොත්, එය නැවත නැවත නොකළ යුතුය. ඒ කෙරෙහි කැමැත්තක් ඇති කර නොගත යුතුය. පව් රැස්වීම මහත් දුකකි.

මිනිසෙකු පිනක් කරන්නේ නම්, එය නැවත නැවතත් කළ යුතුය. ඒ කෙරෙහි කැමැත්ත ඇති කරගත යුතුය. පින් රැස්වීම සැප ගෙන දෙයි.

පාපය විපාක නොදෙන තාක් පව්කාරයා ද යහපතක් දකියි. එහෙත් පාපය විපාක දෙන විට ඒ පව්කාරයා පාපයේ කටුක විපාක දකියි.

පින විපාක නොදෙන තාක් පින්වතා ද අයහපතක් අත්විඳිය හැක. එහෙත් පින විපාක දෙන විට ඒ පින්වතා බොහෝ යහපත් ඵල විපාක දකියි.

'එය මා වෙත නොපැමිණේය' කියා පව සුළු කොට නොසිතන්න. දිය බිංදුව බැගින් වැටීමෙන් වුව ද පැන් කළය පිරෙයි. මෝඩයා ද ස්වල්පය බැගින් එකතු කරමින් පවින් පිරී යයි.

'එය මා වෙත නොපැමිණේය' කියා පින සුළු කොට නොසිතන්න. දිය බිංදුව බැගින් වැටීමෙන් වුව ද පැන් කළය පිරෙයි. නුවණැත්තා ද ස්වල්පය බැගින් එකතු කරමින් පිනෙන් පිරී යයි.

අඩු පිරිවරක් ඇති මහත් ධනවත් වෙළෙන්දෙකු බියජනක මාර්ගය මගහරින්නාක් මෙන් ද, ජීවත්වීමට කැමති අයෙකු විෂ මගහරින්නාක් මෙන් ද, සියලු පාපයන් මුළුමනින්ම දුරු කළ යුතුය.

අතෙහි තුවාලයක් නැත්නම් අතින් විෂ වුව ද දරාගත හැක. තුවාල නැති අතට විෂ ඇතුළු නොවේ. එලෙසම පව් නොකරන්නාට පාපයක් නොවේ.

කිසිදු දොසක් නැති, පිරිසිදු වූ, කෙලෙස් රහිත වූ උතුමෙකුට යමෙක් ද්‍රෝහි වේ ද, සුළඟට එරෙහිව දැමූ සියුම් දූවිල්ල මෙන් ඒ පාපය ඒ මෝඩයා වෙතම පෙරළා පැමිණෙයි.

සමහරු නැවත මව්කුසක උපදිති. පව්කම් කළ අය නිරයෙහි උපදිති. සුගතිගාමී පින්වත්හු ස්වර්ගයෙහි උපදිති. ආශ්‍රව රහිත රහතන් වහන්සේලා පිරිනිවන් පාති.

අහසෙහි හෝ, සමුද්‍රය මධ්‍යයෙහි හෝ, පර්වත ගුහාවකට වැද හෝ කොතැනක සිටිය ද, කළ පාප කර්මයෙන් මිදිය හැකි තැනක් මේ ලෝකයෙහි කොතැනකවත් නැත.

අහසෙහි හෝ, සමුද්‍රය මධ්‍යයෙහි හෝ, පර්වත ගුහාවකට වැද හෝ කොතැනක සිටිය ද, මරණය විසින් යටපත් කරනු නොලබන තැනක් මේ ලෝකයෙහි කොතැනකවත් නැත.