පුෂ්ප වර්ගය

මේ පෘථිවිය ද, යම ලෝකය හා දෙව්ලොව ද ජයගන්නේ කවරෙක්ද? දක්ෂ මල්කරුවෙකු මල් තෝරාගන්නා සේ මැනවින් දේශනා කළ ධර්ම පදය විමසා දැනගන්නේ කවරෙක්ද?

ශෛක්ෂය (හික්මෙන්නා) මේ පෘථිවිය ද, යමලොව හා දෙව්ලොව ද ජයගන්නේය. දක්ෂ මල්කරුවෙකු මල් තෝරාගන්නා සේ ශෛක්ෂයා මැනවින් දේශනා කළ ධර්ම පදය විමසා දැනගන්නේය.

මේ කය පෙනපිඬක් බඳු යැයි දැන, එය මිරිඟුවක ස්වභාවය ඇත්තේ යැයි මැනවින් අවබෝධ කරගෙන, මාරයාගේ මල් හී කපා දමා මාර රජුගේ ඇසට නොපෙනී යා යුතුය.

කාම නමැති මල් නෙළමින්, ඒ කෙරෙහි දැඩි ලෙස ඇලුනු සිතැති මිනිසා, නිදාගත් ගමක් මහ වතුරක් ගසාගෙන යන්නාක් මෙන් මරණය විසින් පැහැරගෙන යනු ලබයි.

කාම මල් පමණක් නෙළන, දැඩි ලෙස ඇලුනු සිතැති, කාමයන්හි කිසිදා තෘප්තියට පත් නොවූ මිනිසා මාරයා (මරණය) තම වසඟයට ගනී.

බඹරා මලෙහි වර්ණයට හෝ සුවඳට හානියක් නොකර රොන් ගෙන පියාඹා යන්නාක් මෙන්, මුනිවරයා ගමෙහි හැසිරිය යුතුය.

අනුන්ගේ දෝෂ නොබැලිය යුතුය, අනුන් කළ නොකළ දේ නොසෙවිය යුතුය. තමා විසින් කරන ලද සහ නොකරන ලද දේ පමණක් තමා විසින්ම විමසා බැලිය යුතුය.

පැහැපත් වුවත් සුවඳ නැති මලක් යම් සේද, එලෙසම එයට අනුව ක්‍රියා නොකරන තැනැත්තාට යහපත් ධර්ම කථාව නිස්ඵල වෙයි.

පැහැපත් මෙන්ම මනා සුවඳින් ද යුත් මලක් යම් සේද, එලෙසම එයට අනුව ක්‍රියා කරන තැනැත්තාට යහපත් ධර්ම කථාව මහා ඵලදායක වෙයි.

මල් ගොඩකින් නොයෙක් මල් මාලා සාදන්නාක් මෙන්, මෙලොව උපන් මනුෂ්‍යයා විසින් බොහෝ කුසල් දහම් කළ යුතුය.

මල් සුවඳ සුළඟට එරෙහිව හමා නොයයි. සඳුන්, තගර හෝ පිච්ච සුවඳ ද එසේ නොයයි. එහෙත් සත්පුරුෂයන්ගේ ගුණ සුවඳ සුළඟට එරෙහිව ද හමයි. සත්පුරුෂයා සියලු දිශාවන් සුවඳවත් කරයි.

සඳුන්, තගර, මහනෙල් හෝ සමන් පිච්ච යන මේ සියලු සුවඳ වර්ගයන්ට වඩා සීලයේ සුවඳම උතුම් වන්නේය.

තගර හා සඳුන් සුවඳ ඉතා සුළුය. එහෙත් සිල්වතුන්ගේ ශීල සුවඳ උතුම් වන අතර එය දෙව්ලොව දක්වා ද හමයි.

සම්පූර්ණ වූ සිල් ඇති, අප්‍රමාදව වෙසෙන, මැනවින් දැන කෙලෙසුන්ගෙන් මිදුනු ඒ රහතුන් ගමන් ගන්නා මාර්ගය මාරයාට සොයාගත නොහැක.

මහා මාර්ගය අසල ඉවත ලන ලද කුණු ගොඩක වුවද, පිරිසිදු සුවඳැති මනහර නෙළුම් මලක් හටගන්නාක් මෙන්;

එලෙසම කුණු බඳු වූ, අන්ධ වූ පෘථග්ජනයන් අතර, සම්මා සම්බුදුරජාණන් වහන්සේගේ ශ්‍රාවකයා තම ප්‍රඥාවෙන් අතිශයින් බැබළෙන්නේය.